Tres estudantes do Campus de Ourense chegan á final do simulador empresarial Beertual Challenge

O certame Beertual Challenge de simulación empresarial que organiza o Grupo Modelo dende 2007 contará na súa final con presenza galega. Así nolo fai saber a Universidade de Vigo, institución na que estudan (precisamente) os integrantes do proxecto finalista, tres estudantes do Máster en creación na empresa que desenvolveron para o concurso a firma cervexeira Pomelo, que comercializa (nun plano virtual) os seus produtos dende a cidade de Ourense e que conta cun ambicioso plan de espallamento no mercado global. Todo isto foi dado a coñecer no transcurso do Forumemprego que se está a desenvolver este xoves no Campus de Ourense e que contou este ano co dito simulador entre as súas achegas formativas.
Por certo que detrás do equipo responsable de Pomelo sitúanse os estudantes Pablo Gutiérrez, Miguel Pato e Silvia Costas, sendo esta última a que dirixiu xunto a un representante do Grupo a presentación no foro das características do certame e do seu potencial como canle de aprendizaxe lúdica e dinámica.
O Beertual Challenge, que vai pola súa terceira edición (con convocatoria mexicano-española e con vistas a ampliar os emprazamentos), está arestora na súa recta final, ficando en competición só dúas empresas españolas (unha das cales é Pomelo) e cinco mexicanas das máis de 600 que se inscribiron. Agora, sinala a Universidade de Vigo, quédalles por diante aos estudantes galegos a parte menos virtual do traballo, logo de rematar a fase primeira como unha das mellores 75 firmas en resultados bursátiles e de deseñar na segunda un plan de espallamento internacional. Está previsto que o 10 de marzo viaxen a México para dar conta da súa iniciativa perante o Comité de Dirección do Grupo Modelo, que non é outra cousa que o xurado físico, real, establecido para un concurso-simulador. De ser os gañadores entre os sete finalistas na modalidade de mestrado –existe outra modalidade con sete finalistas para licenciatura ou diplomatura- terían a oportunidade de realizar unha viaxe internacional de tres semanas de duración.