Caixa Galicia amplía a certificación de calidade ISO 20000 á súa rede de caixeiros

Caixa Galicia, que recentemente foi distinguida polo Ministerio de Interior coa máxima condecoración pola calidade do seu sistema de seguridade de primeiro nivel, vén de acadar agora a renovación da certificación de calidade ISO 20000 na súa banca electrónica e ampliou o alcance inicial da certificación aos 962 caixeiros automáticos, tras superar unha auditoría de seguimento realizada por AENOR.
A banca electrónica de Caixa Galicia foi a primeira de España en obter a certificación de calidade ISO 20000 que, segundo informan dende a consultora colaboradora no proxecto, “confirma que a tecnoloxía da entidade posúe excelentes niveis de fiabilidade, seguridade e calidade”.
No ano 2006 Caixa Galicia foi a primeira entidade en incorporar o envío ao teléfono móbil da coordenada de acceso aos seus sistemas, o que lle permitiu ser unha das entidades con menor número de fraudes. A incorporación do novo DNI electrónico nos seus sistemas tamén permitiu reforzar, aínda máis, a seguridade ante calquera tipo de fraude fomentando a confianza nas transaccións electrónicas.
Na súa aposta por adoptar iniciativas de calidade en todos os eidos da súa tecnoloxía, en 2009 Caixa Galicia converteuse na primeira entidade financeira europea e segunda no mundo en obter o nivel 4 de CMMI (Modelo Integrado de Capacidade e Madurez, nas súas siglas en inglés), estándar internacional que mide a madurez do software nunha organización.
A obtención desta certificación permite a Caixa Galicia converterse en provedor informático de primeira calidade para empresas doutros sectores, ademais de dar mellor servizo aos seus propios clientes.