Veciños do Courel demandan as actuacións precisas para recibir tódalas canles da TDT

Á Televisión Dixital Terrestre na nosa terra aínda lle queda algún que outro camiño por percorrer, sobre todo no que se refire aos aspectos técnicos que se requiren para unha cobertura total, que non deixe fóra a ninguén. Segundo se conta dende a plataforma SOS Courel, a situación de accesibilidade total dos emprazamentos xeográficos de meirande poboación é ben diferente á que se vive en bisbarras afastadas como a devandita. Deste xeito, informa o colectivo, agás nas vilas de Folgoso e Seoane do Courel, “a maioría das veciñas e veciños da comarca non son quen de ver todas as canles da TDT”. Dáse a circunstancia, engádese, de que a oferta de contidos ligada á nova tecnoloxía chega de xeito desigual. Así, “hai aldeas nas que só se recibe o sinal das privadas e noutras só se ve a TVE 1”. Para SOS Courel, é preciso que se solucionen canto antes estes problemas, xa que parece coma “se tiveran repartido as canles entre todos os núcleos de poboación e cada un deles contara cunha oferta dispoñible diferente”.
O que se repite en tódolos casos por igual, sinala a plataforma, é que en ningunha das aldeas é posible recibir tódalas canles públicas. A xuízo de SOS Courel esta situación agrava con moito as carencias tecnolóxicas derivadas da desaparición da Internet sen fíos, un proxecto que implicara o investimento duns 200.000 euros e a habilitación de infraestruturas que, sinala a plataforma, “ficarán tiradas agora polos teitos e curutos da comarca”. A organización, co obxectivo de facer entender o problema, cita nun comunicado recente varios exemplos concretos de veciños da bisbarra afectados polo cesamento do servizo. É o caso de Jesús Alfonso Parada, veciño de Meiraos e autor de diversos libros (A delgada voz dos marxinados ou A cor das uces), quen en virtude destes cambios ficou sen servizo de Rede sen fíos e sen posibilidade algunha de manter comunicación a través do correo electrónico cos seus contactos e coa Universidade a Distancia (UNED) na que cursa estudos. Sen Internet ficou tamén o veciño de Ferreirós de Abaixo, Manuel Álvarez, propietario do bar O Pontón e pai dunha filla que precisa, coma calquera outro neno galego, dos servizos e recursos da Internet para completar a súa formación no Colexio de Seoane e no Conservatorio de Monforte.