TADEGa ponse a disposición dos Concellos para impulsar as TIC integradoras

A asociación TADEGa (Tecnoloxías de Atención Á Diversidade na Educación Galega), da que xa temos falado nesta web para dar conta dos seus esforzos por acadar un espazo tecnolóxico-comunicativo accesible para todas e todos (con independencia das propias características físicas ou psíquicas de cada quen), vén de pór en marcha unha campaña na Intenret co obxectivo de amosarlle o seu apoio formativo e divulgativo ao panorama de Concellos da nosa terra.
A idea da asociación, integrada por profesionais galegos de distintos eidos implicados no ensino e (máis polo miúdo) na atención á diversidade, é ofrecerlles axuda desinteresada a través da convocatoria anual de subvencións aos concellos, “en réxime de concorrencia competitiva, para o cofinanciamento do desenvolvemento do programa de apertura de centros educativos públicos fóra do horario lectivo, a través de diferentes modalidades curriculares”.
TADEGa, plataforma que loita para que as redes sexan integradoras e non habiliten máis atrancos dos que xa existen, informa de que ao abeiro da devandita convocatoria pódense deseñar proxectos de reforzo para a aprendizaxe a través das novas tecnoloxías da información.