Desenvolven un software que avalía o rendemento dos supercomputadores

Un equipo de investigadores formado por persoal do Centro de Supercomputación de Galicia (CESGA), do Grupo de Arquitectura de Computadores da Universidade da Coruña (UDC) e do Grupo de Arquitectura de Computadores da Universidade de Santiago de Compostela (USC), vén de desenvolver a primeira suite de microbenchmarking para a linguaxe de programación paralela Unified Paralle 1 C (UPC), que será liberado para o seu uso pola comunidade investigadora do noso país.
Asemade, este software bautismado como UPC Operations Microbenchmarking Suite (UOMS), servirá como banco de probas para comprobar o rendemento das implementacións da linguaxe UPC. A nova ferramenta permítelle aos avaliadores comprobar o rendemento da execución dunha serie de operacións para unha ampla gama de tamaños de problema e para configuracións de sistemas actuais e futuros.
Según sinalou Ricardo Capilla Pueyo, Presidente do CESGA e Director Xeral de I+D+i da Xunta de Galicia, “este desenvolvemento é un claro exemplo da capacidade de transferencia dos nosos grupos de investigación”, palabras que viñan a conto porque no proxecto colaboran o propio CESGA, Hewlett-Packard (HP) e os grupos de arquitectura de computadores da UDC e da USC.
O traballo introduce unha suite que pretende cubrir a falta de ferramentas para a avaliación de implementacións de compiladores da linguaxe UPC. As linguaxes PGAS (Partitioned Global Address Space) como UPC, debido á súa xuventude, carecen dalgunhas ferramentas e librarías necesarias.
Xa que logo, UOMS aborda a falta de ferramentas de avaliación do rendemento de operacións UPC, tanto colectivas como de sincronización e de xestión e copias de memoria. Segundo informan dende a entidade, “o desenvolvemento e liberación de UOMS a linguaxe UPC está preparada para afrontar o próximo paso na súa evolución”.