Presentada en Vigo a campaña das universidades para defender o galego na ciencia

Ciencia e galego non teñen porqué camiñar afastadas. Máis ben o contrario: a nosa lingua está perfectamente capacitada para comunicar contidos vinculados á tecnoloxía e á investigación, non só por antigüidade senón polo papel no presente que despregan galegofalantes da primeira liña científica, como por exemplo Anxo Carracedo (experto en ADN), Xavier Alcalá ou Jorge Mira. Estes e outros profesionais da investigación son precisamente os promotores da campaña En galego tamén se fai ciencia, iniciativa da que xa falamos nesta web e que vén da man das tres universidades galegas. Pois ben, a campaña, lonxe de ir esmorecendo, recibiu estes días un novo pulo das ditas institucións educativas e dos seus integrantes, obxecto xa de apoios doutras entidades e de outros eidos de traballo, tal como se fixo saber onte nunha cita cos medios convocada en Vigo.
Na cita, entre outros membros da comunidade científico-docente galega, estivo presente Iván Area, vicerreitor en funcións de Relacións Institucionais, quen salientou o pouco peso que teñen os argumentos en contra do emprego da nosa lingua no dito eido e puxo de manifesto, pola contra, as moitas vantaxes que achega o manexo de varios idiomas.
Na presentación da campaña no Campus de Vigo, Area defendeu que a lingua galega é apta para todas as disciplinas e que se non é así perde tanto a diversidade cultural, coma os galegos e a propia ciencia.
O vicerreitor en funcións estivo acompañado polos responsables de Normalización Lingüística das universidades de Vigo e Santiago de Compostela, Xosé Henrique Costas e Manuel Núñez Singala; o secretario xeral da Universidade da Coruña, Carlos Amoedo; a directora da ETSE de Telecomunicación, Edita de Lorenzo e a profesora Iolanda Galanes.