Un amplo número de responsables de proxectos TIC galegos daranse cita este xoves no seminario do CPETIG

Este xoves celébrase no Telecentro de Santiago (con conexión directa á Coruña, Lugo, Ourense e Vigo a través da Rede de Telecentros de Galicia) uns encontros profesionais dirixidos a achegar claves, métodos e ferramentas para asegurarmos as posibilidades de levar a bo porto todo tipo de proxectos empresariais de natureza informática. O Seminario de Boas Prácticas en Xestión de Proxectos, como dixemos os días pasados nesta web, está organizado polo CPETIG, Colexio Profesional de Enxeñaría Técnica en Informática de Galicia e xorde ao abeiro dun convenio asinado entre a devandita entidade e a Secretaría Xeral de Modernización. A xuntanza, segundo nos conta o propio presidente do Colexio (Marcos Mata), vai dirixida a afondar en conceptos clave para o impulso de iniciativas, acompañándose o seu desenvolvemento “dun enfoque diferenciado”.
Entre outras cousas isto significa que se abordarán cuestións como o modelo CMMi amais de metodoloxías áxiles de nova tendencia.
A xornada, como sinala Mata, tamén atende á diversidade no que a destinatarios se refire: “O espectro de público que se pode beneficiar da asistencia é moi amplo”, sinala, “e abranguería entre outros a profesionais que exercen como xefes ou directores de proxecto, pero tamén a xerentes que poden ver deste xeito a mellora cuantitativa, é dicir, o aforro final do proceso, e polo tanto o aumento das marxes comerciais que vén dado por unha política de calidade no desenvolvemento do software”.
O seminario contará coa presenza de recoñecidos expertos nas materias a tratar (José Luis Iparraguirre, Carlos G. Jardón, José Ramón Díaz e David Esmerodes), así como a presenza do INTECO a través de Iñigo Tomé.