Retegal nomea director xerente ao físico José Angel Abeal

O Consello de Administración de Retegal, no marco das accións do Plan de Banda Larga 2010-2013 que a empresa está a levar a cabo para o despregue de infraestruturas de telecomunicacións no noso país, vén de nomear como director xerente a José Ángel Abeal, licenciado en Físicas pola Universidade de Santiago de Compostela na especialidade de Electrónica, que conta cunha ampla experiencia profesional no sector e que está plenamente capacitado para afrontar esta etapa na que Retegal dotará de conectividade a todo o territorio galego.
José Ángel Abeal, de 35 anos de idade, foi dende agosto de 2004 director técnico da Área de Comunicacións de Ednon S.L e responsable Técnico da Área de Comunicacións do Centro de Servizos Tecnolóxicos do Servizo de Informática da Consellería de Sanidade – SERGAS (Servizo Galego de Saúde), desempeñando, asemade, tarefas similares coas empresas Unisys España e Manpower ETT S.A.
Abeal ten unha prolongada experiencia na xestión de proxectos dentro de Ednon S.L. e entre 2008 e 2009 foi responsable do centro de xestión de Rede do Complexo Hospitalario Universitario de Santiago de Compostela e da consultoría, enxeñaría e deseño da rede de Telecomunicacións da Deputación de Pontevedra. Durante o pasado ano, desenvolveu a Rede de Datos do Concello de Vigo e a implementación de servizos de Seguridade Perimetral da Deputación de Salamanca.
José Ángel Abeal substitúe agora no cargo a Jesús García Porto, de quen o Consello de Administración fixo unha valoración moi positiva da súa traxectoria como director-xerente de Retegal nos últimos cinco anos.