A gran industria discográfica só recupera unha miúda parte do que inviste en perseguir as descargas

As grandes discográficas, con todo que xa se andou na Rede, semellan seguir na súa teima de afiar coitelos con respecto á descarga dos seus produtos protexidos. O dato, que en certa maneira era previsible, adquire unha nova dimensión se temos en conta o volume de beneficios reais que lle achega ao sector esta cruzada contra a Internet e as descargas de cancións e filmes con licenzas pechadas. Falamos, segundo se conta no blog Recording Industry vs People e reflicte ADSLZone, dunha cifra que anda a rentes dos 400.000 dólares (314.000 euros), cantidade que para calquera dos nosos lectores non estaría nada mal pero que para a gran industria discográfica non semella supoñer moita riqueza, e máis se temos en conta que gasta 16 millóns de dólares (12,5 millóns de euros) en perseguir a quen usa sen pagar dereitos os seus produtos.
Quen si que sae gañando de todo isto son os avogados que traballan nos bufetes aos que se lles encarga a devandita persecución e condena, a fin de contas os principais destinatarios deses 16 millóns, cantidade que é ben probable que tería mellor rendemento se fose dedicada a promover máis a música. Con todo, segundo os datos presentados pola industria, as cifras que se acadan son maiores cós anos anteriores, como por exemplo en 2007, ano no que se chegaron a gastar máis de 21 millóns.