Os aboados móbiles superan os 5.000 millóns

Un dos últimos informes sobre os recursos hídricos no mundo levado a cabo pola ONU no 2009 indica que “o 67 por cento da poboación, é dicir, uns 5.000 millóns de persoas en todo o mundo, seguirán sen poder acceder a auga potable en 2030”; paradoxicamente, o mesmo número de persoas que na actualidade están aboadas a algún número de móbil e que usan este servizo de maneira habitual. A cifra dos 5.000 millóns de aboados superouse a pasada semana, e complétase con datos tan arrepientes como que en 2010 haberá máis de 50.000 millóns de dispositivos conectados e máis de 500 millóns de aboados 3G. Proseguindo con cifras que poñen a pel de galiña, que por certo foron achegadas por Sony Ericsson, cada día súmanse no mundo 2 millóns de aboados máis e iso é debido, en gran parte, a mercados emerxentes como a India ou China. Xa no ano 2000, do redor de 750 millóns de persoas en todo o mundo tiñan unha subscrición móbil, unha cantidade menor que o total de usuarios que ten China na actualidade, e que está moi lonxe dos 3.400 millóns de usuarios que en 2010 accederán a Internet dende o móbil. Din os especialistas que para uns é cuestión de conveniencia, mentres que para outros é unha necesidade. O certo é que a telefonía facilitou moitos eidos das nosas vidas nos últimos anos pero a dependencia deste servizo comeza a ser un problema para moita xente, que non pode prescindir dos seus móbiles nin para sentar a comer. Nos mercados máis maduros, segundo indica o informe, “é a conectividade entre dispositivos, máis que as persoas, o que está a incrementar o tráfico na Rede”, e dacordo coas previsións da compañía tecnolóxica, “acadaranse os 50.000 millóns de conexións nesta década”, moito antes de que se consiga levar auga potable ás rexións máis maltratadas pola pobreza.