Neste momento xa hai empresas, institucións e organizacións españolas que se suman ás Páxinas de Google+, como o Fútbol Club Barcelona e o Museo Nacional do Prado, e os interesados en sumarse a tal iniciativa poden recorrer a darse de alta a través da sección de creación de páxinas en Google+, que está a espallarse entre os usuarios de Google+ de todo o mundo (polo que moitos deberán agardar a que tal opción estea dispoñible para eles).
Como principais diferenzas entre perfís persoais e páxinas en Google+ estarían que as páxinas non poden engadir a persoas aos seus círculos (agás que fosen engadidas ou mencionadas primeiro), as páxinas son públicas de xeito predeterminado, as páxinas non poden marcar +1 noutras páxinas ou contidos doutras páxinas web, a páxinas non poden gozar de xogos vía web, compartir contidos a círculos ampliados, recibir notificacións por e-mail, nin participar en quedadas dende móbiles, e no caso de páxinas locais, contarán con campos específicos para a súa localización xeográfica (para a súa localización por parte dos usuarios).
Presentación en vídeo das Páxinas en Google+
Outra funcionalidade que están a estrear dende Google é a chamada conexión directa, que permite atopar páxinas de Google+ engadindo un signo de + antes do nome da marca que desexemos localizar, para poder incorporala aos nosos círculos en Google+.
Polo momento a conexión directa só está activada para algunhas páxinas como +Google, +Pepsi e +Toyota, pero irán incorporándose novas páxinas en breve.
A conexión directa vista en vídeo
