Multitude de bromas tecnolóxicas durante o Día dos Inocentes

En España o 28 de decembro , Día dos Santos Inocentes, aprovéitase para facer bromas entre amigos e familiares, pero tamén os medios de comunicación dan renda solta á súa imaxinación inventando novas orixinais e divertidas, que nalgún caso chegan a levar a engano, pero que cada ano teñen unha menor repercusión por verse eclipsadas polas informacións publicadas en medios en liña, como durante esta xornada, na que puidemos ver informacións como a que aseguraba que os operadores de telecomunicacións bloquearían WhatsApp en fin de ano para evitar o colapso das súas redes, que o Goberno prepararía a volta da televisión analóxica tras o fracaso da TDT ou que RIM lanzará un móbil con Windows Phone en 2012.
Tamén puidemos ler que Sony estaría a preparar o lanzamento do xogo SingStar Opera, a xente de Twitter arranxaría o fallo do seu sistema que impedía escribir mensaxes de máis de 140 carácteres, Google+ pasaría dos círculos aos hexágonos, Windows Vista e 7 estarán dispoñibles en andalú, Twitter pechará as contas con faltas ortográficas, unha entrevista a Mariano Rajoy como grande xogador de videoxogos e, para rematar a faena, o nomeamento de BlackBerry como o mellor smartphone do ano.