Nova sentenza xudicial contra o canon dixital

Unha nova sentenza xudicial exime a unha empresa de informática, Support and Technology,S.L., de pagar máis de 18.000 euros á Sociedade Xeral de Autores e Editores (SGAE) correspondentes ao coñecido como canon dixital por considerar que se fixo unha aplicación “indiscriminada e inxustificada” desta taxa, atendendo á interpretación deste gravame por parte do Tribunal de Xustiza da Unión Europea, co gallo dunha denuncia interposta pola SGAE contra a empresa Padawan S.L.
Estas resolucións xudiciais non cuestionan as compensacións por copia privada, senón o seu sistema de aplicación, no que non se facía distinción entre material para uso particular ou profesional, criterio que non se axustaría a dereito, xa que o uso de soportes informáticos por parte de empresas e administracións públicas non podería considerarse coma copia privada, xa que o estarían a empregar os soportes para almacenar documentos propios, comerciais, empresariais ou profesionais que non terían nada que ver coa copia de contidos suxeitos a dereitos de autor.
A mencionada sentenza da Sección Decimoquinta da Audiencia Provincial de Barcelona aínda está suxeita a recurso, aínda que en vista dos precedentes non parece que vaia a existir oposición a tal decisión xudicial.