SeriesYonkis e PelículasYonkis continuarán as súas actividades

Durante a xornada de hoxe circulou por múltiples páxinas web e medios de comunicación a nova de que Jordi Tamargo e David Martínez, aos que atribuían a fundación das páxinas web tan coñecidas como polémicas de SeriesYonkis e PelículasYonkis, desvinculábanse destes proxectos para emprender novos retos, entre os que podería estar o futuro servizo móbil Fever. Esta información daba a entender que era unha consecuencia da aprobación do regulamento da Lei Sinde, pero finalmente a compañía responsable das páxinas web mencionadas, Burn Media, emitiu un comunicado para desmentir as informacións publicadas.
Dende Burn Media aseguran que Tamargo e Martínez deixaron a empresa hai aproximadamente un ano e negan que fosen os fundadores de SeriesYonkis, deixando claro que a información que transmitiron os antigos socios de Burn Media carece de veracidade. Aproveitan a ocasión para engadir que Burn Media ten a intención de continuar as actividades de SeriesYonkis e PelículasYonkis.