Anonymous reacciona ao peche de Megaupload

A Internet está a reaccionar furiosamente ante o peche de Megaupload (e outros servizos asociados) e un dos colectivos que está a emprender unha campaña activa a tal respecto é Anonyous, coa chamada OpMegaupload, a través da que están a lanzar ataques de denegación de servizo coordinados contra páxinas web do Departamento de Xustiza norteamericano, da patronal da industria cinematográfica dos EE.UU. (MPAA), da discográfica da Universal e do equivalente estadounidense da SGAE (RIAA), mentres que en España tamén caeu a páxina web da Sociedade Xeral de Autores e Editores, o que parece terse solucionado empregando servidores externos dependentes de Amazon. En Francia tamén están a emprender ataques contra a páxina web de HADOPI (Alta Autoridade pola Difusión de Obras e a Protección de Dereitos na Internet).
Non deixa de resultar curioso que o hashtag de Twitter #OpMegaupload está dominado por mensaxes en español, o que dá a entender que o uso dos servizos de Megaupload era especialmente intenso dentro do noso territorio, o que algúns aproveitan para criticar que aínda continuamos sen ter un servizo equivalente a Netflix en España, de xeito que non hai alternativa legal a servizos como Megavideo.