Absolven definitivamente á tenda Alechip por comercializar cartuchos para Nintendo DS

A Audiencia Provincial de Oviedo desestimou o recurso presentado pola multinacional Nintendo contra a sentenza absolutoria do Xulgado Penal de Avilés que entendía que Alejandro Fernández Gutiérrez, propietario da tenda de videoconsolas e reparación de teléfonos móbiles Alechip, non era culpable de diversos delitos contra a propiedade intelectual e industrial polos que a compañía nipona esixía 23 anos de cadea.
O caso Alechip remóntase ao ano 2009, cando a Administración de Aduanas de Avilés retivo a petición de Nintendo unha partida de cartuchos que permitían dotar a consolas portátiles da compañía dunha memoria dende a que poder executar software caseiro (o que tamén permite a execución de copias ilegais de xogos). Considerouse que este tipo de produtos non son ilegais (por non servir exclusivamente para a reprodución de copias) e tampouco considerouse que vulnerasen a propiedade intelectual de Nintendo, por ser claramente diferenciables dos produtos da compañía, limitándose a copiar a forma do conector dos cartucho.