O ITG ultima en Baiona un proxecto para permitir o consumo responsable de auga a través das TIC

O Instituto Tecnolóxico de Galicia, do que falamos recentemente con motivo dun importante recoñecemento á excelencia investigadora emitido polo Estado, vén de abordar a última fase dun programa para a xestión responsable da auga que inclúe, neste último chanzo, unha salientable interacción entre informática e consumo eficaz e responsable. O programa en cuestión chámase Wiz e diríxese principalmente a fomentar o emprego razoable da auga, cuestión canto máis importante se temos en conta o inevitable quecemento da Terra que nos agarda. Trátase dunha iniciativa europea que se está a levar a cabo en España e Italia, conxuntamente, materializándose na creación de un sistema de información “práctico e transparente dirixido a cidadáns, empresas e administracións”.
En definitiva, Wiz está encamiñado a permitirnos dispor de datos e servizos de valor engadido relacionados coa calidade e, a cantidade e a dispoñibilidade do devandito recurso. Arestora, informa o ITG, o programa estase a implantar no concello de Baiona, coa colaboración da Deputación de Pontevedra e a empresa Espina&Delfín. O que se busca é mellorar a xestión da auga no municipio, presente e futura. A iniciativa ten tres fases, dúas das cales (análises exhaustivo de datos xerais e locais) xa están rematadas. A terceira, arestora en curso, inclúe o modelado matemático da rede de distribución da auga baseado en Epanet, software libre de referencia na cuestión do consumo do líquido elemento, que permitirá, neste caso, efectuar a simulación do funcionamento da rede de Baiona para prever problemas futuros de abastecemento, ademais de permitir todo tipo de diagnósticos sobre o funcionamento da rede. “Os resultados obtidos”, informa o ITG, “permitirán coñecer a cantidade e a calidade da auga potable do concello, os custes económicos e ambientais do proceso de subministro, se se poden crear novos centros de lecer cun emprego intensivo de auga, se hai que propoñerse a explotación de outros acuíferos, se cómpre anovar a rede, se é preciso fomentar novas pautas para racionalizar o consumo, a dispoñibilidade da auga hoxe e no futuro, é dicir, garantir o subministro se aumenta a poboación e o turismo e se baixan as chuvias e se incrementa a temperatura”.