Críticas aos recortes dende o funcionariado informático

Os recortes e outras medidas como a suba do IVE non sentan moi ben nin no audiovisual nin nos editores dixitais nin, tampouco, nunha parte importante do sector profesional TIC: o das/os informáticas/os que desenvolven o seu labor no eido público. Os membros do Corpo Superior de Sistemas e Tecnoloxías da Información da Administración do Estado (ASTIC) están a criticar os recortes do Goberno central porque “non só afectan aos soldos senón que reducen de xeito drástico as partidas orzamentarias precisas para dar un servizo público de calidade aos cidadáns”.
E máis se temos en conta, sinalan, que as novas tecnoloxías constitúen a resposta máis que probada ao estancamento dos servizos públicos, permitindo non só un maior contacto coa cidadanía, senón aforros importantes de custes e optimización da xestión e do traballo a desenvolver dende as institucións públicas. Os representantes do Consello sinalan nun comunicado que máis da metade das tramitacións coa cidadanía e do 80% das que se levan a cabo coas empresas desenvólvense arestora mediante as TIC, cousa que representa menos do 4% do total do orzamento da Administración.