Tim Cook pide desculpas polo aplicación de mapas de iOS 6

A estas alturas xa non é ningún segredo que a aplicación de mapas de iOS 6 é unha das maiores desfeitas na historia de Apple, prexudicando seriamente a imaxe da compañía, o que levou hoxe a Tim Cook a publicar unha carta aberta na páxina web da compañía para desculparse ante os seus clientes recoñecendo que non foron capaces de entregar a mellor experiencia posible aos usuarios e asegurando que están a traballar para facer a aplicación de mapas mellor.
Cook non admite que a aplicación de Apple Maps sexa unha ferramenta creada para poder afastarse de Google, compañía que está a convertese nun competidor demasiado forte, senón que asegura que só buscaban mellorar a aplicación integrándolle navegación GPS, voz, mapas vectorizados e vistas aéreas, para o que optaron por facer unha aplicación dende cero.
Actualmente hai xa máis de 100 millóns de dispositivos coa nova aplicación instalada, e Cook asegura que canto maior sexa o seu uso, máis mellorará a ferramenta grazas ao feedback recibido, pero mentres a aplicación non estea á altura do esperado fai unha recomendación un tanto curiosa: facer uso de aplicacións de mapas da App Store (como Bing, MapQuest e Waze) e incluso utilizar os mapas de Google e Nokia accedendo aos mesmos a través do navegador web.
Esta desculpa ten certos paralelismos coa polémica que xurdira co lanzamento do iPhone 4, e os problemas de recepción que tiña o terminal, levando a Apple a ofrecer un reembolso de 15 dólares ou unha funda protectora de balde, pero nesta ocasión a compañía de Cupertino non parece ser tan xenerosa, e limítase a unha desculpa e a recomendar alternativas, pois estamos ante un problema de software máis doado de evitar que un fallo no deseño da antena interna dun móbil.