Profesionais do CESGA e doutros centros europeos unen forzas para afianzar as tecnoloxías móbiles no e-learning

Co fin de pór en común unha metodoloxía efectiva de aprendizaxe telemática (e-learning) que incorpore as tecnoloxías móbiles para mellorar a formación de estudantes novos e traballadores no eido rural, púxose en marcha o proxecto europeo MOVE IT (Mobilising Opportunities in Vocational Education with Innovative Technologies), que ten como os seus destinatarios a mozas e mozos de entre 16 e 24 anos. A plataforma tecnolóxica será deseñada desde o Centro de Supercomputación de Galicia (CESGA), que conta cunha traxectoria de case dúas décadas no ámbito da aprendizaxe a través das novas canles tecnolóxicas, e que formará no seu emprego ó profesorado do centro líder do proxecto, o Myerscough College (Reino Unido), así como do Innovatie Praktijk Centrum Groene Ruimte BV (Holanda), Rural Institute of Central Ostrobothnia (Finlandia) e Asociatia pentru Educatie Permanenta (Romanía).
A iniciativa, informa o CESGA, prolonga e amplía a liña de investigación comezada dende o centro galego en 1998 sobre a aplicación das novas tecnoloxías para a mellora do ensino e a colaboración no eido rural, traballo que deu os seus bos froitos, por exemplo, no proxecto Escolas rurais virtuais para a computación na nube, integrado no Colexio Rural Agrupado de Boqueixón-Vedra e gañador do certame Educared polo seu carácter útil e innovador.
Lembrar que no proxecto MoveIT, o CESGA participa como institución transferidora de tecnoloxía, “debido á súa exitosa experiencia e achega de solucións de e-learning noutros proxectos europeos, coma o YES (Youth Employment Support, Apoio ó Emprego Xuvenil)”, engade o centro galego. O CESGA transferirá despois a tecnoloxía e as ferramentas tecnolóxicas axeitadas para que o plataforma poida ser empregada en proxectos de formación telemática desas institucións, mesmo despois de setembro de 2014, cando rematará o proxecto.
Unha ducia de representantes das distintas institucións involucradas en MOVE IT reuniranse en Santiago de Compostela os días 30 e 31 de outubro para comezar coa distribución de tarefas do proxecto e lanzalo así oficialmente. “Durante dous anos”, sinala o CESGA, “analizarán como crear contido de calidade para o alumnado que acceda a distintos cursos a través da teleformación, e buscarán os mellores xeitos de facilitar apoio do profesorado e a colaboración de estudantes entre si para que o feito de que o ensino non sexa presencial non supoña ningún problema”.