Os internautas ven con bos ollos empregar os quioscos como puntos de recollida das súas compras na Rede

Cal sería o sitio mellor para recoller o que mercamos pola Internet? Evidentemente, non falamos de casas ou coches (cousas que tampouco mercaríamos directamente pola Internet, sen antes velas in situ en con todo detalle), senón de obxectos que podamos carretar a casa sen necesidade de acabar deslombados. Segundo apunta un estudo sobre a devandita cuestión feita (entre outros) por Red.es e ANEI, a maioría dos usuarios ve con bos ollos que os artigos que mercan dixitalmente vaian dar aos quioscos, como puntos principais de recollida. Máis polo miúdo, o 81% dos enquisados.
Na investigación, feita para albiscar a viabilidade de empregar os quioscos de prensa como dispensarios de e-compras, participaron consumidores, tendas de e–commerce, operadores loxísticos e quiosqueiros de prensa. Amais do devandito, serviu para demostrar que unha boa parte dos usuarios da Rede prefire a opción de recoller os seus artigos nos devanditos puntos de distribución por riba da alternativa máis tradicional de recibilos por mensaxeiría (o 73% fronte ao 27% do mensaxeiro), en boa medida para evitar o problema de posibles ausencias do comprador ou problemas de comunicación de calquera índole. O estudo tamén subliña a posibilidade de elección do día e hora de recollida por parte do consumidor, (é dicir, un 66% fronte ao 34% da mensaxería); e a adecuación dos horarios dos puntos de conveniencia ao consumidor, (un 63% fronte ao 37%). Segundo os consumidores, os produtos culturais, libros, música, etc. son os máis axeitados para a súa entrega en quioscos, aínda que non se descartan outros produtos como a electrónica de consumo ou pezas de vestir.