A Tecnópole acollerá unha xornada para informar da nova convocatoria de Conecta PEME

O programa Conecta PEME achega importantes oportunidades para as nosas empresas e para os seus proxectos de innovación. Así o entende o centro Gradiant, tal e como sinalamos hoxe en Código Cero, e así o entenden tamén dende o Parque Tecnolóxico de Galicia, a Tecnópole, que para dar a coñecer polo miúdo o potencial da dita convocatoria e as metodoloxías que temos que seguir para participar nela, acollerá o vindeiro 23 de xaneiro unha xornada informativa para profesionais. Dende a Tecnópole, lembran que Conecta PEME vai pola súa segunda edición, que vén da man da Axencia Galega de Innovación, e que recentemente activouse dende esta entidade un investimento público de 8 millóns de euros en proxectos de innovación promovidos por pequenas e medianas empresas galegas.
Todo isto, engade a Tecnópole, “supón a activación de dúas convocatorias deste programa en tan só catro meses, o que en total se traducirá en 40 millóns de euros en mobilización de investimentos para proxectos de innovación das nosas PEME”. O obxectivo do programa é incrementar a capacidade científico-técnica do tecido empresarial galego e fomentar a colaboración público-privada a través do cofinanciamento de proxectos innovadores. A primeira edición, engade a Tecnópole, beneficiou a máis dun centenar de empresas galegas implicadas en 30 proxectos achegados en consorcios que mobilizan 25 millóns de euros en áreas estratéxicas. O pasado 13 de xaneiro publicouse no Diario Oficial de Galicia a segunda convocatoria (en pdf) dotada con 8 millóns de euros e que mobilizará preto de 15 millóns.