Os internautas viaxeiros de Tripadvisor sitúan cinco hoteis galegos entre os mellores do Estado

A comunidade de usuarios de Tripadvisor, servizo destinado a salientar as mellores achegas turísticas do mundo, situou finalmente cinco hoteis galegos na edición número doce dos premios Traveller´s Choice Hotels, dirixidos a distinguir os establecementos máis recomendables para os internautas. Trátase do Hotel Arce (Baiona), o Hotel Costa Vella (Santiago), a Casa Grande do Bachao (Santa Cristina de Fecha, Santiago), a Casa Lema (Muxía) e o Hotel A Quinta da Auga (Santiago). A listaxe de gañadores deuse a coñecer este xoves. Este ano, os premios recoñeceron aos mellores hoteis nas seguintes categorías: Luxo, Mellor Relación Calidade/Prezo, Romántico, Familiar, Pequenos Hoteis, Top Hoteis, e Mellor Pensión/Hostal.
Os gañadores do certame, informaron os responsables de Tripadvisor na entrega de premios, determínanse en base ás opinións e comentarios de viaxeiros de todo o mundo. En total, outorgáronse 7.123 premios nesta nova edición. En España, 142 hoteis foron galardoados polos usuarios. Os premiados repártense entre 15 comunidades autónomas, sendo Andalucía, Balears, Canarias e Catalunya as que maior número de galardóns amorearon. A nosa terra tivo, segundo apuntan dende Tripadvisor, un recoñecemento internacional. Os cinco establecementos galegos recoñecidos foron premiados en catro categorías: Mellor Relación Calidade-Prezo (Arce na 11 posición, Costa Vella no posto 16 e Casa Grande do Bachao en 19 lugar), Mellor Pensión e Hostal (A Casa de Lema, o número 19), Mellor Hotel Romántico (Casa Grande do Bachao, no posto 22) e Top 25 Mellores Hoteis de España (Quinta da Auga, obtendo o posto 9).