Media Markt da Coruña vai para Marineda City

As incógnitas sobre o novo destino do establecemento coruñés da cadea Media Markt, especializada na distribución de electrónica de consumo, veñen de ficar resoltas. Lembrar que a tenda da empresa xermana estaba emprazada nun centro comercial que anunciou o peche das súas portas, o centro Dolce Vita, polo que non se sabía con certeza cal ía ser o paso a dar pola empresa para seguir achegando servizo na cidade galega. Pois ben, este xoves Media Markt comunicou oficialmente que “conta xa cunha nova localización, tras o cesamento por causas alleas á vontade da empresa, da actividade do centro comercial Dolce Vita”. A nova localización estará moi preto da anterior: en Marineda City.
A apertura do novo establecemento está prevista para antes do verán. A compañía pretende continuar “ofrecendo o mellor servizo aos cidadáns da Coruña” e é por iso que “envorcou todos os seus esforzos en atopar unha rápida solución para seguir achegando as mellores ofertas en electrónica de consumo aos cidadáns da localidade”, informaron fontes da empresa. A nova localización de Media Markt en Marineda City contará cunha superficie total de 2.200m2. Media Markt tamén fixo saber que proseguirá mantendo os seus dous centros na provincia da Coruña (Marineda City e Ferrol), catro en Galicia (xunto cos de Lugo e Vigo) e 72 en todo o territorio español.