O CITIC e As Cancelas dan a vindeira semana o pulo definitivo a LocYu Parking

O Centro de Investigación en Tecnoloxías da Información e as Comunicacións (CITIC), impulsado pola Universidade da Coruña, vai dar o pulo definitivo ao seu sistema LocYu Parking no Centro Comercial As Cancelas, un proxecto que xa anunciamos en Código Cero hai algo máis de un ano, con motivo da súa presentación como piloto no devandito complexo comercial compostelán. A data fixada para a nova presentación da iniciativa e a súa posta en marcha oficial é este 2 de febreiro. Como lembraremos, LocYu Parking é un sistema recordatorio da praza de aparcadoiro en interiores.
Instalado no dispositivo móbil do cliente, a aplicación, comercializada por Plexus, memoriza de maneira automática a praza na que aparcamos o noso vehículo, achegándonos logo, ao regresar, a ruta máis curta e de acceso máis doado ata o coche (atendendo a variables como idade, discapacidade ou embarazos).
O sistema tira proveito da tecnoloxía Bluetooth Low Energy para detección automática e, en palabras do centro tecnolóxico coruñés, resulta “especialmente práctico en grandes superficies con aparcamentos subterráneos como acontece no caso das Cancelas, onde non chega o sinal do GPS nin se dispón de cobertura móbil”.
En palabras do CITIC, é un exemplo ilustrativo da súa estratexia de apostar “fortemente” pola transferencia tecnolóxica.
Ao acto a celebrar no centro comercial de Santiago acudirá o xerente do CC As Cancelas, Javier Casado, e Manuel F. González Penedo, coordinador do Centro de Investigación en Tecnoloxías da Información e as Comunicacións (CITIC), promovido pola Universidade da Coruña, institución responsable do proxecto.