AtlantTIC e a UVigo amosan tecnoloxías avanzadas de seu en Transfiere 2016

Os días pasados (10 e 11 de febreiro) celebrouse no Palacio de Feiras e Congresos de Málaga a quinta edición de Transfiere (Transfire en galego), o foro europeo para a Ciencia, a Tecnoloxía e a Innovación, un evento que en palabras do centro galego AtlantTIC (UVigo) converteuse “nun encontro para xerar oportunidades de negocio e atopar potenciais socios tecnolóxicos do ámbito científico e do sector empresarial”. Precisamente AtlantTIC e a Universidade de Vigo recuncaron no encontro tecnolóxico e científico dando a coñecer diversos resultados de investigación levados a cabo no seo da institución. Entre eles, os froitos do proxecto TÁCTICA de AtlantTIC Research Center, unha iniciativa da que falamos recentemente en Código Cero para salientar as súas importantes posibilidades na comunicación aérea.
TÁCTICA, como lembraremos, é un proxecto impulsado polo Centro AtlantTIC, en colaboración con Gradiant e SCR (do grupo Everis Aeroespacial e Defensa). Ao abeiro desta iniciativa, en decembro realizáronse voos experimentais dun enlace satélite para uso civil. Estas probas e validacións da tecnoloxía de TÁCTICA, levadas a cabo no Aeródromo das Rozas (Lugo), asentaron os alicerces para facer posible a transmisión por satélite de máis información en menos tempo, “mellorando a fiabilidade da comunicación nas diferentes condicións de voo, e aumentando a velocidade de transmisión”, informaron daquela os responsables da iniciativa.
Segundo se fixo saber ao abeiro de Transfire, TÁCTICA é “un gran proxecto de I+D con varias liñas de investigación que impulsan o polo de xeración e transferencia de coñecemento TIC creado en Galicia, e que permiten xerar coñecemento aplicado con resultados claramente transferibles á industria”. TÁCTICA conta co apoio do Ministerio de Economía e Competitividade (MINECO) e do Fondo Europeo de Desenvolvemento Rexional (FEDER).
Sobre Transfiere
Trátase do gran foro profesional e multisectorial da innovación española, no que os participantes poden establecer contactos B2B; transferir coñecemento científico e liñas de investigación tecnolóxica; dar a coñecer os seus produtos e servizos innovadores; e coñecer as necesidades tecnolóxicas da Administración Pública. Participan empresas, administracións públicas, asociacións, grandes instalacións científico-técnicas singulares, centros e institutos tecnolóxicos, clústers, fundacións e parques tecnolóxicos. Abórdanse eidos como administracións públicas e compra pública innovadora; aeronáutico e aeroespacial; agroalimentario; enerxía; industria; infraestrutura e transportes; medio ambiente; plataformas tecnolóxicas españolas; sanidade e novas tecnoloxías da información, entre outros.