Redegal consolida a súa presenza en México

A firma galega Redegal está a consolidar fortemente a súa presenza en México, un país, sinalan os responsables da empresa con sede central en Ourense, onde se está a experimentar un intenso dinamismo no mercado dos dispositivos e o comercio electrónico (a metade dos compradores en liña contan con tres dispositivos de acceso á Internet: computador, tableta e smartphone). A andaina de Redegal no país americano remóntase a hai tres anos: logo de ter constatando a oportunidade de mercado que comezaba a ofrecer Latinoamérica en xeral e México en particular, a compañía galega abriu sede de seu en DF. Arestora, a oficina conta cun equipo de traballo integrado por directivos altamente cualificados (directora de oficina, key account managers, chief operating officer, chief technology officer) e “un longo etcétera” de profesionais do sector tecnolóxico.
“Para manter a nosa filosofía de traballo e valores da empresa”, sinalan dende a compañía que dirixe Jorge Vázquez, “a oficina en México conta con moita frecuencia coa visita do equipo profesional emprazado en Ourense”, incluídos o propio Jorge Vázquez e máis Tiago Mojón, director de Operacións (CTO) da división española. Estas estadías alén do Atlántico adoitan ter obxectivos de formación e, tamén, de establecemento e afianzamento de contactos con clientes (proxectos baseados en novas tecnoloxías en xeral, comercio electrónico, mercadotecnia en liña).
Segundo fixo saber recentemente Redegal, a estratexia de afianzamento e consolidación da compañía en México baséase en reforzar e impulsar unha estrutura que xa amosa, de por si, axeitados índices de medre. Entre as empresas que xa contan cos servizos da firma galega atópanse firmas dos sectores téxtil, do transporte por terra e do transporte aéreo. En boa medida, trátase de proxectos do ámbito do comercio electrónico. Segundo engade Jorge Vázquez, a previsión (por unha banda) é ampliar a carteira de clientes cara aos sectores da alimentación, entre outros, e (por outra banda) duplicar a facturación en México. Este proceso de espallamento acompañarase dunha estratexia parella en Colombia, onde Redegal comeza tamén a facerse firme.