Camariñas premia as mellores imaxes obtidas dende o banco do Cabo Vilán

A Concellaría de Comercio e Turismo do Concello de Camariñas está a organizar este verán un concurso de fotos nas redes sociais co obxectivo de dar a coñecer os atractivos e a paisaxe da zona costeira de Cabo Vilán. O certame, máis en detalle, recoñecerá as mellores e máis votadas fotos obtidas dende o senlleiro banco de Camariñas, sen dúbida un dos emprazamentos máis sobranceiros da nosa costa e de máis alá dela, primeiro porque achega un inmellorable punto de vista do faro, segundo porque abrangue a inmensidade do mar (xusto diante) e, terceiro, porque á dereita do banco temos unha das contornas litorais (cantís, areais case virxes) de meirande valor paisaxístico de Europa. As fotos deberán ir xeorreferenciadas e etiquetadas cos hashtags #elmejorbancodelmundo e #Camariñas. O prazo para participar fica aberto ata o 31 de agosto.
Os fotógrafos deberán subir as imaxes realizadas dende o banco de Camariñas ao Facebook e máis a Instagram. Nestas redes sociais poderán ser compartidas para acadaren máis votos. Haberá dous premios semanais para as fotos máis votadas e dous premios finais elixidos por un xurado entre as 25 fotos máis votadas ao remate do certame en cada unha das redes.
Premios semanais: bolsa-agasallo Camariñas, o mar todo composta por unha camiseta promocional do concello, un paquete de caixas de conservas de peixe e mariscos elaboradas en Camariñas, dúas entradas para o Museo do Encaixe e para o Museo Man de Camelle e dous pases para a Mostra de Encaixe de Camariñas que se celebrará no ano 2017.
Premios finais: Fin de semana en Camariñas con aloxamento dunha noite para dúas persoas nun establecemento pertencente á Rede de Hostaleiros local e un xantar ou cea para dúas persoas nun restaurante da localidade que pertenza á devandita Rede. Recibirá tamén a devandita bolsa-agasallo e dous billetes para unha visita guiada polo termo municipal.