Preséntase o proxecto SmartPEME en Redondela

Na mañá de onte presentábase na Casa da Cultura de Redondela un proxecto do que xa demos conta en Código Cero, falamos de SmartPEME (substituto do antigo CPAE 2.0) entre o tecido empresarial e asociacións de empresarios e empresarias de Redondela coa finalidade de promover a estratexia dixital entre as PEME. Ao acto asistía o deputado de Innovación e Promoción Económica, Javier Dios, para amosar este servizo encamiñado ás PEME (Pequenas e Medianas Empresas) á procura dunha mellora nas súas vendas e tarefas, de cara a abrir novas canles de actuación e acadar novos grupos de interese como os e as emprendedoras, as asociacións empresariais e os axentes de dinamización en concellos. Iso si, cun eixo común: acadar estes obxectivos mediante as Tecnoloxías da Información e da Comunicación (TIC) e as novas tecnoloxías (redes sociais, comercio electrónico…).
Para isto, as oficinas de SmartPEME no Porriño, Cambados, Pontevedra, Lalín, Ponteareas e Vigo porán en marcha as seguintes actividades: itinerarios de obradoiros temáticos (con varios niveis de dificultade), eventos de networking trimestrais (con profesionais de prestixio), colaboración con asociacións e promoción de alianzas institucionais, especialización sectorial dos asesores (segundo as súas necesidades), kits de asesoramento en novas tecnoloxías a emprendedores, identificación e difusión das necesidades TIC aos provedores de solucións para as PEME e impulso de novas carteiras de servizos de asesoramento.
SmartPEME consegue que a colaboración cos concellos sexa máis estreita, pois preséntase como un servizo propio dos municipios, para que sexan eles os que empresten o asesoramento e impulsen ás empresas, persoas autónomas e emprendedoras.