As múltiples vantaxes do Big Data para as nosas empresas, ao detalle este 15 de decembro na Coruña

Este 15 decembro celébrase no auditorio da Escola de Negocios IESIDE na Coruña (no número 31 da Ronda de Nelle) un encontro profesional destinado a pór relevo as oportunidades que lles abre as empresas a información masiva xerada ao abeiro das novas tecnoloxías da comunicación, incluídas os principais acubillos onde rastrexar novos clientes e mercado: as redes sociais. Segundo sinalan os organizadores deste evento, a xuntanza Big Data en PEME 2016, ao seu abeiro abordaranse os novos camiños que abren cousas como os datos inxentes ou a Internet das Cousas (IoT) para “xerar valorar na contorna competitiva das pequenas e medianas empresas galegas”.
A xornada, apoiada pola Deputación da Coruña, comezará ás 16.00 e contará coa participación de diversos expertos sobre metodoloxías para a explotación e a capitalización do dato, sobre Big Data en contornas financeiras, sobre o concepto de “información positiva” ou Good Data, sobre analítica avanzada de clientes, sobre a análise de datos coa ferramenta R ou sobre como planificarmos unha estratexia de mercadotecnia dixital que teña como alicerce os datos.
Na xornada participarán (entre outras) empresas como Abanca (Jorge García Romarís, do Centro de Competencia Analítica e Big Data), Oracle Ibérica (Eduardo Stanich) ou SolidQ (Antonio Soto, director executivo). Tamén intervirá Inycom, concretamente o seu director Iván Lalaguna, que achegará aos presentes “ás oportunidades e ameazas que ofrece a intelixencia de datos”. A xornada comezará ás 16.00 en IESIDE, A Coruña, e nela agárdase que os expertos reunidos poñan de manifesto as máis avanzadas estratexias para tirármoslle o máximo proveito ao que nos contan os usuarios-clientes potenciais nos diversos acubillos que fornecen as redes.
O obxectivo deste evento, engade a organización, “é divulgar o traballo de empresas adicadas aos datos inxentes, a intelixencia nos negocios e a analítica de datos”, ao tempo que se tentará motivar a pequenas e medianas empresas galegas para que se afiancen neste ámbito, “unha área cun longo percorrido e potencial” e un terreo profesional que “ofrece grandes oportunidades e que require non só perfís técnicos con capacidade analítica, senón profesionais con formación humanística que saiban comprender, interpretar e aproveitar o valor do Big Data e os seus temas afíns”.