Víctor Salgado amosaranos na Coruña as novidades que veñen en materia de protección de datos

A CEC (Confederación de Empresarios da Coruña), con motivo do Día Europeo da Protección de Datos, vai celebrar este xoves 26 unha xornada para tratar as incidencias no novo regulamento para a salvagarda da información en relación coas pequenas e medianas empresas (PEME). A actividade, que se celebra en colaboración Pintos & Salgado Avogados, desenvolverase a partir das 10:00 horas. O presidente da CEC, Antonio Fontenla, inaugurará a xornada que estará impartida polo socio fundador do dito bufete, Víctor Salgado. Trataranse temas de gran interese para as nosas empresas e profesionais con presenza e actividade na Rede, e máis tendo en conta que o regulamento xeral de protección de datos será aplicable a partir de maio de 2018 a todas as organizacións que tratan con información, supoñendo este regulamento “un compromiso máis activo por parte das entidades”, en palabras da CEC.
Víctor Salgado dará a coñecer esta norma para que “os empresarios e traballadores teñan claro cales son as novidades e as obrigacións principais en materia de protección de datos”, explica a entidade que preside Fontenla, engadindo que o relator falará sobre os datos de carácter persoal, aclarando aspectos relativos á calidade dos mesmos, o dereito á información na recollida do coñecemento, o consentimento do titular dos datos, e distinguirá entre os distintos tipos de datos e a súa seguridade.
Ademais, Víctor Salgado comentará o novo regulamento europeo e os seus conceptos básicos, como son o Privacy by Design ou a transferencia internacional de información, coñecida como Privacy Shield. Finalmente, ofrecerá unha introdución sobre o dereito ao esquecemento e o dereito á carrexabilidade de datos, ademais de comentar as infraccións e sancións previstas no regulamento.