Pintos & Salgado achegará formación legal en TIC ás empresas da provincia da Coruña

Con motivo do Día Europeo da Protección de Datos que se celebra hoxe, a Confederación de Empresarios da Coruña (CEC) celebrou a xornada Incidencia do novo regulamento de protección de datos sobre as PEME, en colaboración con Pintos & Salgado Avogados. O presidente da CEC, Antonio Fontenla, inaugurou a xornada impartida polo avogado e socio fundador do devandito bufete, Víctor Salgado. Segundo lembraron, o regulamento de protección de datos será de aplicación a partir de maio de 2018 a todas as organizacións que tratan datos e supón un cambio no cumprimento da normativa, “esixindo un compromiso máis activo por parte das entidades”. Fontenla indicou que os cambios unificarán e modernizará a normativa, “permitindo aos cidadáns e ás empresas un mellor control sobre os seus datos”. A sesión complementouse coa sinatura dun acordo para favorecer formación e asesoramento continuo.
Volvendo ao miolo da xornada, Fontenla expresou a súa confianza en que este proceso asegure e garanta “a aplicación das novas regras de maneira uniforme e coherente en todo o territorio da UE”, incentivando a innovación e favorecendo a creación de novas oportunidades de negocio, “tendo en conta a relevancia económica que os datos persoais adquiriron no marco actual da economía dixital”.
Pola súa banda, Salgado deu a coñecer detalles de interese sobre como afectarán estas renovacións aos empresarios e traballadores (obrigas principais en materia de salvagarda da información). Falou sobre os datos de carácter persoal, aclarando aspectos relativos á calidade dos mesmos, o dereito á información na recollida da información e o consentimento do titular da mesma. Asemade, distinguiu entre os distintos tipos de datos e a súa seguridade.
Alianza
A maiores do devandito, a CEC e o bufete Pintos & Salgado Avogados asinaron hoxe un convenio de colaboración no ámbito das novas tecnoloxías da información, no que se inclúen iniciativas de carácter formativo, asesoramento legal, comercial e colaboracións noutros proxectos de contido técnico e legal que xurdan en común. Concretamente, iniciarán a súa colaboración con asesoramento xurídico-práctico en casos como os riscos actuais das redes sociais por parte das empresas e os seus clientes; o grao de cumprimento da Lei de protección de datos; o coñecemento e emprego de sinatura electrónica e e o grao de implantación da factura electrónica nas PEME da provincia da Coruña.