Gradiant e a USC recollen as demandas dixitais no tecido agroalimentario galego

Onte tiña lugar o GandAgro 2017 en Silleda (o foro agropecuario de Galicia), nese contexto celebráronse tres obradoiros organizados polo Polo de Innovación Dixital, impulsado polo Campus Terra da USC e o Centro Tecnolóxico de Telecomunicacións de Galicia (Gradiant). Estas actividades xurdiron para recoller as demandas de profesionais do eido agroalimentario e TIC, en canto á súa relación coas novas tecnoloxías dixitais e os atrancos para introducilas no seu día a día. A xornada, estruturada en tres obradoiros, estivo dirixida a recoller contribucións de todos os axentes da cadea de valor e innovación no sector agroalimentario e no sector TIC, incluíndo a representantes de cooperativas e industrias, clústers e asociacións empresariais, membros de centros tecnolóxicos e grupos de investigación, representantes de empresas TIC, así como técnicos da administración pública involucrados na innovación deste eido.
No seo de cada obradoiro, elaboráronse sete grupos de traballo conformados por profesionais heteroxéneos que puideron expoñer as súas ideas.
O resultado destes obradoiros ficará nun documento de cara a definir as melloras que deben ser incorporadas no sector. Este documento servirá de punto de partida para contribuír ao proceso de dixitalización do sector agroalimentario galego. Esta sesión de traballo tamén serviu para perfilar a participación de Galicia na iniciativa europea Plataforma S3 Agri-Food.
O Polo de Innovación Dixital é un foro a prol da innovación dixital no sector agroalimentario que se estreaba o 6 de outubro na Casa do Saber do Campus Terra da USC, celebrando a súa primeira reunión de traballo o 15 de decembro en Compostela, onde se estableceu un plan de traballo a curto prazo.
A sesión de traballo organizado polo Polo de Innovación Dixital para o Sector Agroalimenario estivo presidida polo vicerreitor de Coordinación do campus de Lugo e director do Campus Terra, Javier Bueno, co vicerreitor de Desenvolvemento Científico e Tecnolóxico do campus de Lugo, Andrés Barreiro Lois, quen actuou como dinamizador dos grupos de traballo nos que se recolleron as sensibilidades dos máis de medio centenar de profesionais asistentes. Na presentación dos obradoiros tamén participaron o director xeral de Gradiant, Luis Pérez Freire, e o director da Fundación Semana Verde de Galicia, Ricardo Durán.
A clausura da xornada de traballo correu a cargo do vicerreitor de Desenvolvemento Científico e Tecnolóxico do campus de Lugo, Andrés Barreiro, e contou coa presenza da directora xeral da Axencia Galega de Innovación, pertencente á Consellería de Economía, Emprego e Industria, Patricia Argerey.