O CPXG fai un chamamento nas redes sociais a prol das mulleres xornalistas

Hoxe é o Día Internacional da Muller Traballadora e o Colexio Profesional de Xornalistas de Galicia non quere deixar pasar a ocasión de recordalo a todos os sectores da poboación, facendo fincapé nas novas xeracións e, por proximidade, no ámbito xornalístico (onde sobreviven múltiples eivas discriminatorias, tanto no que atinxe aos contidos achegados como ao eido profesional en si mesmo). Por esta razón, a entidade vén de intensificar as súas iniciativas a prol da igualdade nas súas canles dixitais. Nun plano máis concreto, puxo en marcha a campaña #IgualdadeDePrensa para reivindicar os nomes e figuras de compañeiras de profesión que “fixeron posible un xornalismo menos machista”. Podemos velo no Twitter e no Facebook do Colexio.
Segundo lembra a entidade ao conto dos porqués da campaña, o xornalismo non é alleo á discriminación patriarcal, e isto maniféstase en múltiples aspectos, dende fendas salariais de xénero ata acoso e violencia ás comunicadoras. A isto cómpre engadir a “invisibilidade das mulleres”, que deixou no esquecemento o labor e a herdanza de moitas xornalistas. A páxina web do CPXG, precisamente, está a servir estes días para inverter na medida do posible este proceso de ocultación que se remonta aos comezos mesmos da profesión xornalística tal e como a coñecemos (como por exemplo o caso da profesional galega Sofía Casanova, que entrevistou ao revolucionario Trotsky en 1917, sen que case ninguén tivese hoxe en día constancia deste feito).
Ademais, o Colexio de Xornalistas está a compartir estes días, coa etiqueta #IgualdadeDePrensa, os nomes, as imaxes e as historias de mulleres que contribuíron de maneira central ao desenvolvemento do xornalismo, como símbolo para reivindicar a igualdade plena de mulleres e homes nos medios. Nomes como por exemplo o de Gerda Taro, pioneira do fotoxornalismo de guerra, ou o de María Luz Morales, que en 1936 pasou de ser a única muller da redacción de La Vanguardia á primeira directora dun xornal en España.