Ábrese a convocatoria do Programa de innovación social dixital CeMIT-Innova 2017

A Axencia para a Modernización Tecnolóxica de Galicia (AMTEGA) anunciou hoxe a apertura da convocatoria do Programa de innovación social dixital CeMIT-Innova, que se pechará o 31 de marzo. Durante o obradoiro práctico sobre Metodoloxías participativas aplicadas ao deseño de proxectos, enmarcado neste programa debulláronse os detalles da convocatoria ante máis de 60 axentes das aulas CeMIT.
O período de inscrición na terceira edición do CeMIT-Innova remata o 31 de marzo e o 10 e abril daranse a coñecer os 10 proxectos innovadores seleccionados, que pasarán a executarse ao longo do ano 2017. A inscrición poderá realizarse a través da web de CeMIT, na que están publicados os criterios que se terán en conta á hora de seleccionar as aulas CeMIT-Innova 2017 e o Formulario de participación no proxecto.
A novidade desta terceira edición CeMIT-Innova é que todos os proxectos formarán parte do I Concurso de Innovación Social Dixital e poderán optar ao Premio Son Dixital á mellor iniciativa dixital, cunha mención especial de recoñecemento ao labor do voluntariado que participa nestes proxectos innovadores. O gañador, elixido no último trimestre do ano, optará a un premio tecnolóxico doado por entidades galegas patrocinadoras, que quixeron sumarse a esta iniciativa.