A complicada relación de Prince coa Internet parece que vai pasar ao esquecemento tras o pasamento do artista, e ao igual que en febreiro a súa música volveu aos servizos de streaming como Spotify, agora podemos ver como os vídeos do Príncipe de Minneapolis comezan a emerxer na súa canle oficial de YouTube (plataforma na que Prince se esforzaba en non estar presente, denunciando constantemente contidos que empregaban a súa obra musical ata o punto absurdo de chegar a eliminar vídeos familiares polo feito de que se escoitaba a canción Let’s Go Crazy de fondo).
Entre os vídeos de Prince que se incorporaron nas últimas horas a YouTube están temas de Purple Rain como Baby I’m A Star, I Would Die 4 U e Take Me With U nas súas versións en directo e os vídeos musicais de When Doves Cry e Let’s Go Crazy. Deste xeito podemos entender que os vídeos musicais de Prince e moitas das súas actuacións en directo acabarán chegando oficialmente a YouTube, facilitando así o seu goce por parte dos seareiros do falecido artista, que por fin di adeus ao ostracismo.
O vídeo musical de Let's Go Crazy do filme Purple Rain
é un dos contidos que emerxeron hoxe da conta oficial de Prince en YouTube
