A Deputación da Coruña axuda ás novas empresas a equipárense tecnoloxicamente

A Deputación da Coruña convocou axudas para, entre outras cousas, renovarmos ou adquirirmos equipamento informático na nosa nova empresa. A iniciativa materialízase a través da liña de subvencións PEL-Emprende, que destina 1.126.388 euros a impulsar 194 empresas de mozos e mozas da provincia. Con estas achegas, sinala a entidade provincial, quérese apoiar ás/aos emprendedoras/es de entre 25 e 35 anos, empadroados nos concellos da provincia, na posta en marcha da súa idea de negocio ou no afianzamento da mesma. As axudas destínanse ao investimento en “bens inventariables novos” e “necesarios para a actividade empresarial”. Isto abrangue, de xeito natural, os equipos e as aplicacións informáticas precisas para o bo funcionamento das empresas. As axudas cobren adquisicións de ata 40.000 euros, dos cales o 50% (20.000 euros) é subvencionado pola Deputación.
O presidente da Deputación da Coruña, Valentín González Formoso, sinalou que esta liña do Plan de emprego local (PEL) “contribuirá a consolidar o tecido emprendedor da provincia con novos proxectos que empezan de xeito moi modesto, pero que nuns anos poden chegar a consolidarse e ser referencia no seu sector”.
Estas axudas complementan as xa concedidas a través da liña PEL-PEME, mediante as cales a Deputación da Coruña financia a contratación de 224 persoas noutras tantas empresas da provincia.
Para a valoración das solicitudes á liña de subvencións do PEL-Emprende, a Deputación tivo en conta, entre outros aspectos, o carácter innovador da empresa, o número de traballadores e o seu sector profesional. Déuselles maior puntuación ás iniciativas empresariais relacionadas co ámbito do medio ambiente, as enerxías renovables e as empresas de base tecnolóxica; así como aquelas que aplican medidas de responsabilidade social empresarial, como conciliación da vida laboral e familiar dos traballadores, fomento da igualdade de xénero ou inserción laboral de persoas con discapacidade.
Entre os concellos con maior número de solicitudes presentadas e admitidas destacan A Coruña (34), Santiago (22), Santa Comba (10), Narón (7), Arteixo(6), Culleredo (6), Ferrol (6), Vimianzo (5) e Ribeira (5).
A comarca da Coruña e As Mariñas é a que máis axudas concentra, un total de 69, que suman 348.449 euros. Doutra banda, a Deputación achega a 63 empresas da comarca de Santiago un total de 387.669 euros.