Fotolog volve á vida

Aínda que durante bastantes anos Fotolog foi todo un referente para a mocidade española, esta plataforma social foi perdendo pulo e chegou a desaparecer temporalmente da Rede ata que a primeiros de 2016 anunciaron que o 20 de febreiro dese ano borrarían definitivamente os seus contidos, para que os usuarios con contas activas puidesen gardar as imaxes publicadas, polo que foi toda unha sorpresa que estes días o servizo volvese á vida, deixando claro que o equipo detrás deste proxecto é completamente novo, pero curiosamente recuperaron boa parte dos contidos da plataforma anterior.
Dende Fotolog lembran que a súa plataforma tiña unha identidade clara, baseada no feito de que só permitía subir unha fotografía ao día, o que consideran que actualmente é unha boa opción ante o exceso de contidos que atopamos nas redes sociais. Deste xeito converten unha limitación en virtude, asegurando que coa limitación de publicacións é máis doado que vexamos sempre os contidos interesantes dos nosos amigos.
O novo Fotolog está dispoñible vía web, conta xa cunha aplicación para Android, e ten a súa aplicación para iOS enviada para revisión á App Store, polo que probablemente estea dispoñible en poucos días.
O que si está a resultar algo polémico é o feito de que cando entramos na páxina web de Fotolog recíbenos un aviso indicando que actualizaron as súas condicións de uso para adaptarse ao RXPD, o que resulta bastante difícil de crer, principalmente porque esta páxina web susténtase nunha chea de datos de usuarios que hai un par de anos prometeuse que serían destruídos, e o seu uso sen o consentimento expreso dos seus usuarios non parece axustarse nin á lexislación actual nin á anterior, aínda que haberá que agardar para ver se a AEPD entra a valorar o asunto.