Australia prohibe o uso de tecnoloxía 5G de Huawei e ZTE

O proteccionismo estadounidense no eido das telecomunicacións ante as empresas chinesas parece ser contaxioso, e o Goberno australiano vén de prohibir o uso de tecnoloxía de telecomunicacións 5G de Huawei e ZTE en Australia, medida moi sorprendente, xa que compañías como Huawei levan moitos anos subministrando equipamentos de telecomunicacións e, de feito, é un dos principais provedores tecnolóxicos (na súa propia publicidade destacan que levan 15 anos operando en Australia e que garanten as telecomunicacións da metade dos australianos).
Os gobernos están a tomar medidas contra as empresas chinesas ante o suposto temor de que o Goberno de China poida influír nas empresas chinesas para empregar a súa tecnoloxía para comprometer a seguridade das telecomunicacións doutros países, acusación da que non hai ningunha evidencia pública, e que parece totalmente arbitraria e, de feito, en Europa non hai ningún tipo de restrición ás operacións de empresas de telecomunicacións asiáticas.
Deixar de lado a tecnoloxía de telecomunicacións chinesas para a cidadanía en xeral (nos EE.UU. só puxeron restricións para o uso por axencias gobernamentais) podería supor un serio retraso para a adopción do 5G en Australia, utilizando a seguridade como desculpa para tal sacrificio, o que non parece xustificado se a suposta ameaza carece de argumentos.