Isaac Ramiro Freire, gañador do concurso de postais de Nadal do CPEIG

O Colexio Profesional de Enxeñaría en Informática de Galicia (CPEIG) fallou o concurso de postais de Nadal de 2018, un tradicional certame da entidade profesional que preside Fernando Suárez e que ten o obxectivo de conmemorar estas datas festivas ao tempo que se celebra a creatividade da rapazada a través dun punto de vista TIC. O xurado desta sétima edición do certame acordou, por unanimidade, elixir como gañador a Isaac Ramiro Freire, quen recibirá como agasallo un kit de robótica.
A postal de Isaac Ramiro Freire, de seis anos de idade, foi presentada polo colexiado Federico Ramiro González. A postal é a imaxe dunha árbore de Nadal ataviada con adobíos típicos destas festas e representada na pantalla dun ordenador portátil co texto Bo Nadal.
O traballo de Isaac será a postal oficial coa que o CPEIG felicite as festas do Nadal este ano, acompañada da lenda: Cos mellores desexos de paz e prosperidade, a Xunta de Goberno do CPEIG deséxalle Bo Nadal e Feliz Ano 2019.