O Satélite LUME-1, Premio da Crítica de Galicia

Este sábado entregáronse en Vigo, no Centro Social Afundación, os novos Premios da Crítica de Galicia, edición 46, nas súas modalidades de Creación Literaria, Investigación, Música, Iniciativas Culturais e Científicas, Artes Plásticas, Artes Escénicas, Cine e Artes Audiovisuais e Cultura Gastronómica. A vertente máis tecnolóxica veu dada polo Premio de Investigación, que foi dar ao Satélite LUME-1, lanzado dende Rusia en 2018 pola Universidade de Vigo (grupo CIMA), pola Agrupación Aeroespacial e pola firma Alén-Space.
Baixo o lema Teñamos o valor de darnos o futuro, xuntáronse na entrega de galardóns unhas trescentas persoas representativas dos diversos ámbitos da política, da sociedade e da actividade cultural do país, entre as que se atopaban Abel Caballero, alcalde de Vigo; Carlos López Font, vicepresidente da Deputación Provincial de Pontevedra; Víctor F. Freixanes, presidente da Real Academia Galega e Cesáreo Sánchez Iglesias, presidente da Asociación de Escritor@s en Lingua Galega (AELG), entre outras.
O xurado
O xurado do Premio da Crítica de Galicia da modalidade de Investigación estivo formado por Amparo Alonso Betanzos, catedrática do Departamento de Ciencias da Computación da UDC e presidenta da Sociedad Española para a Intelixencia Artificial; Ricardo García Mira, catedrático do Departamento de Psicoloxía da UDC; Águeda Gómez Suárez, profesora do Departamento de Socioloxía, Ciencia Política e da Administración e Filosofía da UVigo (Campus Ourense); Martín López Nores, profesor do Departamento de Enxeñaría Telemática da UVigo; María Loureiro, catedrática do Departamento de Fundamentos de Análise Económica da USC; José Luís Mascareñas Cid, gañador da edición anterior, director do CIQUS, catedrático da USC e Jorge Mira Pérez, que actuou como secretario en representación de Premios da Crítica de Galicia.
Finalistas
O xurado acordou declarar como finalistas ao artigo Botton-up síntesis of multifuctional nanoporous Graphene (de César Moreno, Manuel Vilas-Varela, Bernhard Kretz, Aran Garcia-Lekue, Marius V. Costache, Markos Paradinas, Mirko Panighel, Gustavo Ceballos, Sergio O. Valenzuela Diego, Peña e Aitor Mugarza); ao proxecto Satélite LUME-1 (do Equipo da Escola de Enxeñaría de Telecomunicacións, da Escola de Enxeñaría Industrial e da Escola de Enxeñaría Informática Campus de Ourense da Universidade de Vigo, liderado por Fernando Aguado Agelet); e á obra Golpistas e verdugos de 1936. Memoria dun pasado incómodo (da que son editores Lourenzo Fernández Prieto e Antonio Miguez Macho). Tras unha complexa deliberación acordou outorgar por maioría o premio a Satélite LUME-1, “por supoñer unha achega galega de impacto científico internacional no eido tecnolóxico, que combina a loita contra unha praga do noso país coo o lume, un impacto económico coa creación dunha incipiente industria aeroespacial galega e poñer a Galicia, literalmente, no espazo”.

O satélite
O satélite específico LUME-1 forma parte do proxecto Fire-RS (WildFire Satellite and UVAs Remote Sensing System), coordinado pola Agrupación Aeroespacial e o grupo CIMA da Universidade de Vigo. Trátase dunha iniciativa dirixida a loitar contra a destrución dos lumes botando man das máis avanzadas tecnoloxías da comunicación, da robótica, a enxeñaría industrial e a análise de información. No paquete de recursos avanzados dos que bota man o proxecto atópase o satélite de dous quilogramos lanzado con éxito en 2018 dende Rusia.
O LUME-1, para quen non o saiba, é o cuarto satélite lanzado ao espazo pola UVigo, un vixía automático dotado con tecnoloxía punteira para loitar contra os incendios forestais.
Como dixemos, o FireRS é un proxecto europeo coordinado dende Vigo pola Agrupación Aeroespacial e o grupo CIMA no que participan tamén a Universidade de Porto e o Laboratorio de Análise e Arquitectura de Sistemas de Toulouse. O proxecto veu un orzamento de dous millóns de euros e o seu obxectivo foi “crear unha ferramenta que sexa quen de realizar unha detección temperá e achegar información en tempo real dos lumes forestais aos servizos de emerxencia”.