Facebook merca unha empresa española especializada no xogo por streaming

Dende a división de videoxogos de Facebook sorprenden esta mañá anunciando a compra de PlayGiga, rexeitando realizar máis declaracións polo momento, o que supón un importante fornecemento de Facebook Gaming de cara á realidade virtual e aos xogos en mobilidade.
Playgiga é unha empresa madrileña orientada a ofrecer xogos como servizo a empresas de telecomunicacións, editores e outras empresas, e segundo Cinco Días esta operación de compra podería terse pechado por 70 millóns de euros, e sería a primeira compra realizada por Facebook en España.
Esta compañía quería converterse nunha plataforma semellante a Google Stadia, contando xa con socios como Warner, SEGA, Square Enix, Capcom ou Codemasters, e xa contaba con produtos como Wade Box, á venda en El Corte Inglés, e que por 99,90 euros incluía o hardware preciso para gozar do seu catálogo de xogos directamente no televisor. Este dispositivo incluía 6 meses de servizo, que tras ese período pasaría a custar 6-8 euros/mes, pero o pasado 3 de decembro deixou de operar, o que podería ter que ver coas negociacións con Facebook.
Haberá que agardar para saber máis detalles da operación de adquisición de PlayGiga por parte de Facebook Gaming, pero non sería unha sorpresa que nuns meses Facebook entrase activamente a competir coas emerxentes plataformas de xogo en streaming.