Continúan os despedimentos en Twitter e os verificados pagados volverán a finais de mes

Temos que afacernos a que non hai día sen que Elon Musk dea titulares á fronte de Twitter, e nos últimos días a cousa chegou a niveis tan esaxerados que non sería de sorprende que todo fose unha cortina de fume para que o público non se fixase en que os despedimentos na compañía non se limitaron a 3.700 traballadores, senón que agora aseguran que Twitter xa prescindiu de 4.400 dos 5.500 traballadores externos, ou sexa, o 80%, o que podería explicar moitos dos problemas que está a experimentar Twitter tanto a nivel técnico como na moderación dos seus contidos.
Dentro do apartado laboral puidemos ver como un desenvolvedor da aplicación de Twitter para Android deixou publicamente en evidencia a Elon Musk ao confirmar que non sabe como funciona realmente a plataforma social a nivel técnico, indicando o que debería ser o rumbo a tomar para mellorar a aplicación móbil, para atoparse con que era despedido sen unha comunicación oficial para que logo Musk se apropiase das súas ideas; pero resulta que esta actitude non se limita a manifestacións en público, senón que os traballadores que amosan algún tipo de disconformidade nos foros internos da compañía tamén están a ser despedidos, quedando claro que non hai espazo na empresa para quen non concorde totalmente con Musk.
Nun ambiente laboral tan negativo resulta abraiante que Musk se permite facer burla ao publicar unha fotografía na que posa xunto a dous supostos traballadores da compañía readmitido, cando estamos a falar dun par de bromistas que cando se produciron os despedimentos masivos en Twitter fixeron crear á prensa que eran traballadores da compañía abandonando o edificio cos seus efectos persoais en caixas de cartón.
Pero o comportamento infantil de Musk tería chegado a extremos insospeitados ao burlarse dun senador dos EE.UU. que estaba a protestar porque fora suplantado en Twitter, ao que o propio senador respondeu de xeito firme sinalando os moitos problemas que teñen as empresas de Musk, e instándoo a solucionalos ou o Congreso terá que intervir.
O que si afirmou seriamente Musk nas últimas horas é que os verificados a través de Twitter Blue volverán o vindeiro día 29, engadindo que os selos de verificación tradicionais eliminaranse dentro duns meses se as contas en concreto non pasan a pagar por Twitter Blue.