A Cámara en Santiago organiza un seminario sobre as posibilidades da IA para xerarmos contido

Proseguen este mes de decembro as actividades de formación tecnolóxica da Cámara de Santiago dirixidas a propiciar e facilitar a transformación das pemes da contorna. Este 4 de decembro a entidade cameral celebrará o seminario en liña Ferramentas de IA para xerar contido para a túa páxina web e redes sociais.
Dará comezo ás 10.00 horas coa presentación Oficina Acelera Peme para o Kit Dixital e a partir das 10.15 abordarase o miolo da sesión poñendo o foco nas vantaxes e desvantaxes da IA, nas mellores ferramentas intelixentes das que podemos botar man para xerar contido e nos máis axeitados recursos para crear texto, imaxes e vídeos.
Tameń se porá o foco noutras ferramentas de IA que nos axudarán a mellorar arquivos de audio e presentacións, e nas implicacións éticas e de privacidade ao utilizar ferramentas de IA para xerar contido.
Os relatores son Juan José Manso Carballo, fundador de GFM-Ideas (consultora orientada á automatización e transformación dixital para pemes, que asesora en desenvolvemento de negocio e estratexias innovadoras) e Rubén Beiroa, enxeñeiro en electrónica e automática industrial (director executivo de Train On Tech e co-fundador de Everlatir (formador e Integrador de solucións IoT e coordinador do Nodo 5G de Galicia). Esta xornada está organizada pola Oficina Acelera Peme para o Kit Dixital da Cámara de Comercio de Santiago de Compostela.