A excelencia investigadora do CiTIUS da USC, recoñecida pola Xunta

Os cinco centros da Universidade de Santiago que forman parte da Rede CIGUS participaron este martes 12 de febreiro na Cidade da Cultura no acto de recoñecemento que a Xunta de Galicia lles rendeu por ser “claves na investigación de excelencia universitaria e actuar como motor de progreso de Galicia”. Entre os centros distinguidos atópase o CiTIUS, referencia galega e estatal no ámbito da Intelixencia Artificial.
Recolleron o recoñecemento os directores do Centro Singular de Investigación en Química Biolóxica e Materiais Moleculares (CIQUS), José Luis Mascareñas; do Instituto Galego de Física de Altas Enerxías (IGFAE), Carlos Salgado; do Centro Singular de Investigación en Medicina Molecular e Enfermidades Crónicas (CIMUS), María Isabel Loza; do Centro de Investigación Singular en Tecnoloxías Intelixentes (CITIUS), Senén Barro; e do Centro de Investigación Interdisciplinar en Tecnoloxías Ambientais (CRETUS), María Teresa Moreira.
A rede CIGUS, que conta hoxe con 1.600 investigadores e captou nos últimos catro anos máis de 180 millóns de euros en proxectos competitivos, é un modelo único en España co-financiado no marco do programa operativo FEDER Galicia 2021-2027.
Ademais dos cinco centros de excelencia da USC, conforman esta rede, pola Universidade de Vigo, o Centro de Investigación en Tecnoloxías de Telecomunicación(AtlanTTic), o Centro de Investigación en Nanomateriais e Biomedicina (CINBIO) e o Centro de Investigación Mariña(CIM), e pola Universidade da Coruña, o Centro de Investigación en Tecnoloxías da Información e as Comunicacións (CITIC) e o Centro de Investigacións Científicas Avanzadas (CICA).
No mesmo acto, fíxose tamén entrega de placas de recoñecemento polo seu labor investigador aos centros colaborativos CITEEC, CINTECX e ECOBAS, este último dirixido pola profesora da USC María Loureiro, que recolleu o galardón.
No acto participou o reitor da USC, Antonio López, que interveu no recoñecemento aos centros da USC.