Castela-A Mancha activou o Plan Territorial de Emerxencia (PLATECAM) en fase de alerta ante a previsión de grandes concentracións de persoas polo eclipse solar total, unha decisión acompañada dun uso do sistema ES-Alert que provocou a difusión dunha mensaxe de Protección Civil directamente nos teléfonos móbiles da poboación, provocando grandes críticas ante o que moitos consideran un abuso dun sistema deseñado para alertar en situacións de emerxencia como catástrofes naturais.
O aviso, emitido polo 112 de Castela-A Mancha, inclúe recomendacións para observar o eclipse con seguridade, evitar desprazamentos innecesarios, non estacionar nas beiravías nin sobre vexetación seca, respectar as restricións de acceso e utilizar lentes certificadas. A mensaxe tamén pide protexerse do sol e das picaduras de insectos e seguir as indicacións das autoridades.
Entre as indicacións enviadas mediante ES-Alert figura unha petición especialmente destacada: «non chame ao 112». Protección Civil xustifica esta recomendación pola previsión dun incremento de chamadas asociado á elevada concentración de persoas, co obxectivo de evitar a saturación do teléfono de emerxencias.
O recurso a ES-Alert para trasladar recomendacións xerais sobre un fenómeno astronómico volve poñer sobre a mesa o uso deste sistema de alertas masivas, deseñado para situacións que representan un risco grave para a poboación. Neste caso, o aviso foi enviado a toda a rexión ante a previsión de desprazamentos e concentracións vinculadas á eclipse, algo que a todas luces semella excesivo, tendo en conta a información masiva que chegou á cidadanía a través dos medios de comunicación, e incluso as numerosas campañas divulgativas realizadas polo propio goberno autonómico.
O operativo mobiliza preto de 200 efectivos, con reforzos nos servizos sanitarios, de emerxencias, protección civil e prevención de incendios. As autoridades recomendan evitar desprazamentos innecesarios e acudir, cando sexa posible, a lugares habilitados para a observación.
A protección ocular é outra das prioridades, co uso obrigatorio de lentes específicas homologadas para a observación directa do Sol. As autoridades lembran que as lentes de sol convencionais non ofrecen protección suficiente e que non se deben utilizar cámaras, prismáticos ou telescopios sen filtros solares adecuados.
O PLATECAM permanecerá activo para avaliar as posibles incidencias derivadas da concentración de persoas e adaptar a resposta dos servizos de emerxencia segundo evolucione a situación.
