34 empresas buscan no Foro Tecnolóxico de Emprego o talento do alumnado da UVigo

Esta primeira semana de marzo de 2023 (de martes a xoves) celébrase no Campus de Vigo unha nova edición do Foro Tecnolóxico de Emprego, no que participan as tres escolas de enxeñaría con sede na cidade. Este evento, organizado “por e para o propio alumnado”, acada a súa 23 edición converténdose “nun clásico do calendario universitario”, en palabras UVigo, que puxo o foco unha vez máis no principal cometido da cita: tender pontes entre o mundo académico e o laboral. En total, 34 empresas e institucións están implicadas a través de postos informativos instalados no recibidor da EE de Minas e Enerxía.
Estes espazos de seu establecen un diálogo directo do alumnado, que pode coñecer as necesidades e demandas do tecido empresarial, entregar os seus currículos e axilizar unha posible contratación. De xeito paralelo, tanto a EE Industrial, como a de Minas e Enerxía e a de Telecomunicación acollen conferencias e presentacións técnicas sobre temas de interese escollidos polo alumnado a través de enquisas previas, e tamén obradoiros para mostrar e potenciar as súas aptitudes e desenvolver as súas competencias.
A primeira xornada do foro arrancou con presentacións de empresas como Indra, GBTEC Software, Accenture, Seresco e Borgwarner que deron paso ao acto oficial de inauguración, no que participaron o vicerreitor de Planificación e Sustentabilidade da Universidade de Vigo, José Luis Míguez, xunto con David Regades, delegado do Estado na Zona Franca; as concelleiras Elena Espinosa e Ana Mejías; Elena Alonso, directora da EE de Minas e Enerxía; Mohamed Boutinguiza, subdirector da EE Industrial; e Rebeca Díaz, directora da EE de Telecomunicación.
O vicerreitor José Luis Míguez trasladou a felicitación da Universidade a todo o equipo organizador, representado no acto pola coordinadora, María Purriños, e a “todas as mulleres que gañan peso neste evento” edición tras edición. Tanto o vicerreitor como David Regades e Elena Espinosa, que interveu en representación do Concello, coincidiron en salientar a importancia da interrelación entre o público e o privado, entre as empresas e as administracións públicas, “unha cooperación que se plasma tanto neste foro como noutras iniciativas nas que a UVigo participa xunto coa Zona Franca e o tecido empresarial, como o a futura fábrica de semicondutores fotónicos ou o primeiro proxecto de hidróxeno en Galicia”.
Detrás deste evento hai un grupo de algo máis de 20 estudantes das tres escolas de enxeñaría do campus vigués que, ao longo dos últimos meses, traballou arreo para converter o programa nunha realidade.
Entre as principais novidades desta edición está a posibilidade de subir os currículos á plataforma Beamian, unha opción que se retoma da edición de 2020, ou a presenza dun posto informativo da Área de Emprego, no que o alumnado pode revisar os seus CV e facer melloras antes de envialos e onde tamén hai un fotógrafo para que aqueles que o desexen poidan tomar unha foto profesional para os seus perfís de Linkedin ou para os currículos. Por outra banda, para incentivar a participación do alumnado nas actividades do foro, tamén se realizan sorteos, que inclúen dende un iPad ata patinetes eléctricos.