O punto limpo de Ames recibiu en xullo 4.500 quilogramos de material electrónico e eléctrico

O Concello de Ames vén de facer reconto do volume de material RAEE recollido o mes pasado polo seu punto limpo, situado no polígono de Milladoiro e xestionado por Urbaser. En total, rexistráronse 612 visitas ao centro de depósito, en palabras do Goberno de Ames “unha das cifras máis elevadas de entradas por mes dende que se inaugurou o servizo en xaneiro de 2007”. Do material carrexado salienta sobre todo o incremento dos residuos eléctricos e electrónicos (RAEE) que se achegaron aos 4.500 quilogramos.
Segundo informa o Concello, as cifras demostran o compromiso cada vez maior da veciñanza coa reciclaxe e co correcto tratamento dos refugallos. Proba disto, engade, é o volume de material informático e electrónico recollido, ao que cómpre engadir os 180 quilogramos de envases baleiros contaminados e os 220 quilos (32 unidades) de pneumáticos que se atopaban fóra de uso. Tamén se entregaron 90 unidades de tubos fluorescentes e outras lámpadas, 240 quilos (15 unidades) de baterías de chumbo, 10 quilogramos (400 unidades) de pilas e 22 unidades de aerosois.