Víctor Salgado debateu co CPEIG sobre protección de datos, Intelixencia Artificial e postverdade

Hoxe celebrouse unha nova sesión do programa de debates tecnolóxicos tres14.pm, posto en marcha polo Colexio Profesional de Enxeñaría en Informática de Galicia (CPEIG) para impulsar o intercambio de coñecemento e o networking entre as colexiadas e colexiados, por unha banda, e profesionais expertos e referenciais, pola outra. A actividade desenvolveuse no restaurante Árbore da Veira no Mirador do Monte de San Pedro da Coruña. O persoeiro convidado foi o avogado especializado en TIC Víctor Salgado Seguín, quen centrou o seu relatorio en tres liñas argumentais: o regulamento sobre protección de datos, a lexislación relacionada coa Intelixencia Artificial, e o tratamento dos datos das redes sociais por parte dos partidos políticos.
Salgado abriu fogo debullando as normativas actuais referentes á protección de datos, poñendo o foco no Regulamento Xeral de Protección de Datos da Unión Europea de 2016 e na Lei Orgánica de Protección de Datos Persoais e Garantía dos Dereitos Dixitais de 2018, onde se establecen novas obrigas e responsabilidades para as empresas e profesionais que traten datos. Relacionou tamén estas normas cos novos modelos de negocio que xorden na Rede e o que contempla o actualizado Réxime Sancionador de Protección de Datos.
No relativo á Intelixencia Artificial, Víctor Salgado compartiu cos asistentes o contexto legal actual, destacando que se trata dunha tecnoloxía que queda fóra da lexislación, aínda que existe un proxecto da Unión Europea para regular esta cuestión, establecendo límites e un código ético, tanto para compoñente de software como de hardware. Comentou tamén os modelos de IA máis coñecidos a día de hoxe, como son a explotación de datos que usa Google (Google Assistant) e Amazon (Alexa) ou outro asistente de voz como o Siri de Apple.
Outro tema relevante que tratou Víctor Salgado foi o tratamento que realizan os partidos políticos dos datos persoais presentes nas redes sociais a través das tecnoloxías de análise da información a gran escala, o Big Data, aspecto que contempla a actual lei española de protección de datos.
Ao fío do devandito, Salgado tamén tocou temáticas como a postverdade, un novo concepto que alude á manipulación e a difusión de noticias falsas para influír na sociedade e na súa vontade de voto. Como exemplos reais disto, lembrou os escándalos relacionados coa compañía inglesa Cambridge Analytica que supostamente utilizou datos de contas de Facebook para a campaña de Trump e no proceso electoral do Brexit. “Sospeitamos que esta é a punta do iceberg polo que se precisa maior vixilancia na protección de datos e na privacidade dos usuarios de redes sociais. En España non se confirmou ningún caso. Aínda que todos os partidos políticos están presentes e activos nas redes sociais, ata a fecha non hai constancia de técnicas semellantes”, dixo.