Chega a nova edición do campamento científico lucense Xuvenciencia

Hoxe presentouse en Lugo unha nova edición (a sétima) do campamento científico da Universidade da Santiago, no que van participar 150 estudantes, formándose en materias STEM (Ciencia, Tecnoloxía, Enxeñaría e Matemáticas) e, sobre todo, divertíndose mentres adquiren todo tipo de coñecementos. A iniciativa, que se desenvolverá baixo o epígrafe Fago, logo aprendo! celebrarase do día 1 ao 5 de xullo. Das 150 prazas devanditas, un centenar serán para estudantes novos e 50 para quen participou en anteriores edicións. A iniciativa foi presentada pola Deputación de Lugo, o Concello e a USC.
O deputado Turismo, Eduardo Vidal Baamonde, a concelleira de Benestar Social, Igualdade e Inclusión, Ana González Abelleira, e a Vicerreitora de Coordinación do Campus de Lugo, Montserrat Valcárcel Armesto, presentaron este luns no edificio de Vicerreitorías a VII Edición do Campamento de Verán XuvenCiencia, un campamento dirixido ao alumnado de 4º da ESO e 1º de Bacharelato, no que tamén poden participar rapaces e rapazas de 2º de bacharelato que xa participaran en anteriores edicións. No acto de hoxe tamén interveu a coordinadora deste campamento científico, Mercedes Novo.
O Deputado salientou que “é moi importante achegar aos rapaces a este tipo de actividades, que fomenten o seu interese pola actividade científica, que é un motor da sociedade e do seu desenvolvemento, por iso o programa inclúe actividades como a creación de vídeos contra o ciber-acoso ou contra os estereotipos de xénero”.
O programa divídese entre as actividades comúns, as que son para o alumnado novo e as dirixidas aos estudantes veteranos. Polas mañás visitaranse centros e institucións colaboradoras polas mañás, durante as que os rapaces participantes deberán elixir entre os obradoiros e proxectos que máis se adapten as súas preferencias, as tardes están dirixidas a unha programacións máis lúdica como xincanas, visitas ou actividades musicais grazas ao programa Lumieira Acompaña.